最近孩子想睇Captain Underpants。上呢度圖書館網頁搜尋一下，等借書既讀者不少。書都出版了10年以上，有點意外仍然係細路至愛。 呢個系列屬於橋樑書，字數多過每頁一兩句既英文書，但以圖畫為主講故事。當初出版時，佢和Wimpy Kid帶起了一個新既出版熱潮。兩個系列都係攪笑，而Captain Underpants既笑料更幼稚，甚至在我地眼中係低能！英文字又係專登串錯，睇黎學英文，真係咪講笑！ 當時有同事好睇唔起Captain Underpants本書，因為嚴格來講，攞佢和傳統reader似係Christmas Carol比較，文字和內容都算「水皮」。但係，鼓勵孩子閱讀唔駛咁功利，以reading for pleasure為目的，唔好驚左一大版唔知係乜既英文，覺得睇書係件開心既事先係重要。 一直懷疑堂堂一個大人，點解可以寫出如此傻既故事？原來Captain Underpants就係作者Grade 2時既心境。當孩子睇完作者既新作Dog man，睇到連汁都撈埋，話我知作者係嗰陣時，因為每天上課都被罰在走廊，就不斷寫故仔和畫工仔創作出Captain Underpants, 老師發現了，不單無鼓勵，仲撕左佢，叫作者不要再寫Silly books…… 望清楚介紹作者那版，原來佢有ADHD, dyslexia和behaviour problems。和孩子慢慢解釋完後，見到最後一句係’Fortunately, he was not listening to the teacher.’ 於是和孩子講，假如佢放棄了，就無Captain Underpants書了。 每個人既成功，背後都會有一段辛酸既故事。對看不起自己既人，唔聽佢地講再堅持做自己既事係正確的。人生，畢竟只屬於自己。
Category: reading
The very first gift
This is for you, my love!
圖書館
期待已久的圖書館終於開放，我卻真的失望而回。 沒有想過它會像Central library / HkU library咁大，但我真的想過，既然是serve成個區，加上起左接近３年，真不明白點解只係一個得一層的小型圖書館！ 每次乘車，我都會想象佢係有兩層，一層中文書，一層英文書。真實係，佢將所有圖書館應有的features都擠在一起，唉，好失望！ 除左書籍全新，英文書方面的選書較合流合原素外，無甚特別。人流較多時，更難以擠到書架找書，唉，設計失敗。
The King’s Speech
在差不多滿座的周六特別場，睇了奧斯卡大熱片The King’s Speech, 令上個周末，真的心滿意足！ 不想在這穿故事情節，反而想講下本地劣質的翻譯。呢套戲的Script其實唔難聽，亦唔會難明，不過，翻譯們卻沒有好好消化套戲再用適當的字眼去形容主角的心情。例如，當King George VI 和speech therapist爭論的一幕，他講了”I have a voice.”, 我認為那一場係想表達佢自己有自己的一套見解，亦不易受他人影響。中文字幕卻出了「我有把聲。」！唔係唔岩，不過唔對應context. 同樣另一句又係好簡單的英文，他講”I have a head”, 中文出了「我有個頭。」。我認為佢呢一場都係想表達佢有自己主意的意思。 這樣的話，當然令大家發笑，但也真的無必要！ 本片沒有什麼驚喜，但處處見細膩和功整，幾個角色性格分明，各自以勇氣去做好本身角色，真的睇得感動！ 建議入場一眼都唔好望中文字幕，那就真的完美了！
Power spot
日本流行講power spot. 其實我都有自己的power spot, 那就是戲院、書店和咖啡室，多年不變，我想以後都係會這樣。 趁著一個小小的空檔，一個人去了這些地方，單是揭下書也很寫意。 係既，都要用下錢，但不需要太多，就已經買到心頭好，心情已經得到很大的滿足。 充了電後，人都開心一點，精神一點。 若總是困在一個死沉沉的局中，永遠都不會有希望和衝勁！ 做人，又怎可以這樣呢？
睇書
開工前，好想讀一些自己愛看的書。 我是個什麼書都會睇的人。中英也無所謂的，而一本好睇的書，更可以一天內將之消化完！ 所以，花了兩天睇一本二百多頁的中文小說，其實已算慢。 這次又是東野圭吾的作品－變身。那是一個關於移植腦袋的故事。如果讀過他的另一個作品－秘密，那對於他沉迷靈魂轉移的喜好不會太陌生。在他那愛留白的文字空間，又會令我想起故事主角有精神病的可能性。不過，講到最後，作者對人與人之間那份愛的闡釋都沒有放棄過，這次，愛又是一個絕望的表現。 這次讀得奇慢，絕對是與印刷有關。我可以肯定自己睇不慣橫印加簡體字的書，而這只是習慣和時間的問題。不過，睇完那些存貨後，再不會貪平再買了。 而且，據朋友和睇網上的review,都講這些書與原文會有出入。 事實如此嗎？不清楚，但已經減少了我購入簡體書的欲望。
MK Blog 