開心返PD

持續進修,專業發展,各行各業員工,久不久都要返下PD (Professional Development)呀,以前鄉下返得多,少數自願,多數被迫。不少人只會攞來攝時間,面黑上堂既都不在少數。

但今日第一次響外地返既PD,見倒全部仍有火既老師,留心投入;有位同工,只係剛從南非到埗和太太團聚,但又因為實習要返家,想起都頭痕。同桌另一個同鄉,之前素未謀面,但聽到後,立即留低聯絡,話之後可以介紹工作。

團結真是力量。對今次PD有點失望,但同學間既交流卻成為重點。

大家臨離開,仲要送上祝福Good luck 和All the best!

呢個PD,已經成為我目前去過最好既PD。

大家都係有心又開心既老師,最後得益既必定係學生。

Advertisements

腰骨指數

89和64這個數字,響social media睇到既news feed,也顯示了眾生相。

見倒那些去食飯打卡既post, 呢一日總覺得寧舍討厭。

有個住在海外既朋友,平日喜愛出posts俾大家知道自己既教仔和飲食旅行生活,呢類posts好受大家歡迎啊!一般都吸引倒50至80個likes!

但佢一出個post提下大家呢一日呢?佢既朋友就閃走哂,likes只有小貓數隻!

香港人好聰明,識走位也自知。其實唔駛年輕政黨既提醒,都知道我城人人已經自我審查吧!年輕人既識趣和扮唔知,係保護自己既方式。或者食花生既觀眾覺得佢地要坦白點,但切身處地又怎能體會佢地既感受?

網路公審和紀錄,係一個永遠既黑洞。呢種恐懼,需要好強既勇氣去面對。

每個人都有權選擇。有人選擇遺忘,有人選擇回憶。不過,無反省又怎能繼續向前走?

摘生果呢份工

外國既月亮係咪特別圓?早日香港某份報紙報導紐西蘭缺乏採摘生果既人手,時薪港幣$90(紐西蘭最低時薪$16.5)都無人做,成為了想去工作假期既新選擇。
好多人都會拎住短期visitor visa黎呢度,一邊打工,一邊儲錢。之前響孩子既幼稚園就認識一個女子,由英國飛到來南半球,遊完澳洲再來紐西蘭,做孩子褓母賺旅費之後繼續玩。僱主包飲食住宿,佢既責任就係好好照顧兩個幼童日常生活,湊返學放學和陪玩!
呢份working holiday既好工,未必人人都搵得倒。
今日當地媒體Radio New Zealand 訪問了一些人,探討點解有工都無人肯做。
原因包括,摘生果係體力勞動既工作,做半日只得NZ$30(約港幣$180),仲會肩背作痛,寧願失業都唔做。
另一個受訪者認為,每日做十小時相同既事,走上走落,落雨更會無工開,無糧出。
噢,原來係手停口停既工作,而老闆都無俾足人工。
政府已經放寬短期簽證,希望可填補接近10,000既空缺。
有人亦指出,由於果園一般遠離市區,一去打工就準備留居果園,但外地工人會有住宿安排,本地工人只能「訓」車。
呢度也透露了,果園主人不肯改善待遇,係唔會有人去打呢些「牛工」。
一大批新鮮既生果,就只能睇住佢地變爛了。

有禮貌

響孩子課室門口等湊放學,孩子同班女同學和我say hello!

呢位孩子口中不太相熟既同學仔,平日感覺cool cool地,都有留意過佢成日搵孩子傾計,但我無期望過她會同我傾兩句。

之後,另一個男同學,又話我地放學時經過佢屋企啊。係啦,那次行過和他揮手嘛。既認識的,點解一個hello都慳?

另一半成日講我有小朋友人緣,可以去搵幼稚園老師既工。的確也曾有呢個想法,可以搵食都不錯。

但最安慰既係,新學校既同學都好乖,個個基本有禮貌,唔係見人當透明。孩子響呢種環境學習,近朱者赤,社交一定有所收穫吧!

如果不是轉了校,或者我會以為本土小朋友都係不睬人的!

轉校決定係明智。

Friday surprise

從圖書館借來新書,其中一本叫Friday Surprise.

孩子好奇,再問我,呢個星期五會有乜驚喜。

反問佢,原來借番來既新書,就可以係surprise.

真係好愛書既一個寶寶。

點解TSA不死?

TSA也好, BCA也好,一邊有家長開FB group反對去考,另一邊新聞就講,接近40%既小學已經申請全部小三學生去考。

剛才見倒一個FB 既post (見cap圖),有人問家長fans想唔想收到免費英文練習,因為那些係佢孩子補習老師俾既,成效好好云云。

FB有個特別既功能,就係朋友在一些Page既留言有可能會讓你讀到。無意間,俾我睇到一個孩子正在私校就讀既媽媽,寫左想要小一至小六既練習。那間私校己經出名壓力大,似係發現谷得既孩子仍做不夠?其他人既反應都好熱烈,可見呢類資源的確好搶手。

港媽大多係咁樣,一方面響FB反對做功課既群組大罵老師俾既功課,一方面又自行默默搵多啲功課迫孩子做,操練無止境!講一套,做一套。

所以,肯定考TSA既學校數目會繼續增加。小朋友既命運在父母手中,依家能讓你離開苦海既人都無埋!

悲哀!

*****
同文另刊Medium, 請去瀏覽多多支持!
The same blog post is published at Medium.

短期遊學大生意

今星期做家長義工,見到幾個來自強國既小朋友和家長。聽老師講,他們遠道而來,大人在呢度做生意,只會短期停留學習。

坐在身旁既另一個Kiwi家長,爆出一句: Poor girls! 想了一整天,我都不太明解佢呢句說話既意思。或者,佢以為幾個小朋友係會和父母分開,畢竟得一年級咁大,心理上係幾難受。又或者,佢覺得小朋友只能讀得一陣,根本不能夠學習得什麼。

呢個係我既想法多一點。但「外國人」趁假期去學校讀書,在孩子既上一間學校已經有例子,而呢個現象係好普遍,本地學校都幾歡迎佢地報名「插班」讀一陣。

就似上年7, 8月,係不少「外地」學校既暑假,卻係呢度既冬天,小朋友無長假放,要繼續上課。某一天,就見到10個8個陌生面孔在校園出現。香港會叫呢種係遊學團,而上次所見既主要係來自強國和南韓。他們會插班學習,感受本地學生既上堂方式,最重要的緊係學英文,期望在短時間中有進步。

咁樣讀貴唔貴呢?望番某學校既網頁,「國際學生」返一星期需要交NZ$300, 通常又不會返倒10星期,唔係就要俾NZ$3000, 那至少都會返兩三個禮拜,仲有行政費NZ$500一學期(好似無寫一禮拜點計), 活動和材料費NZ$80. 想一對一教英文,就要再加俾NZ$300一星期。

遊學團一般都係一條龍服務,連埋機票(不要忘記旺季黎特別貴)和住宿,一定會交5位數字既費用。見過有家長會埋個細路一齊來,即係差不多交多一份,條數都幾「甘」!

去年孩子班中有個日本同學。由於佢響日本未夠大返小學,乘著響度出世既方便,每次日本幼稚園放假,就見佢「攝」返來「讀書」。小朋友本身都在國際學校讀書,但家長仍覺不夠,要飛咁遠來「浸」幾個禮拜。雖然唔需要交國際生費用,但他們在學校附近短租幾個禮拜,NZ$2000都差不多吧!連埋其他費用,一樣係「甘」!

我不想一口否定呢種短期學習既效用。或者那位家長不太清楚何謂immersion,也不了解響真正既英文環境有幾特別。我相信小朋友見識過後,對學習語言應該會更接受多於抗拒。至於交朋友就未必可行,因為時間太短了,友情需要長時間建立。

學校對招收呢類短期學生也幾積極。想不到現在孩子讀既學校都被看上!呢度學校資源比較緊張,見到有人上門幫學校增加收入,我呢個家長一定認為係好事!

至於老師,看得出面有難色,但卻不能反對。一如既往,打工仔就係要煮到來就食吧!

英作這樣教

近日幫手做parent helper,去Year 1班房教學生寫字讀書,觀察埋老師點樣教書,獲益良多,也有相當反思。

我發現,以前英文作文老師教錯哂!

雖然以前讀Band 1 英中,但英文作文卻係到中一時先第一次做。小學時所謂既英文寫作,都只係停留響作句階段,俾一兩個字就自己寫,點樣構思和用字,係從無概念,一片空白。

還記得Miss第一次作文,響黑板寫完題目,講完字數和得兩堂既時間後,就叫大家收埋字典和notebook,憑記憶寫約130字。無討論,更無準備。後來知道每次作文係當平時分,那根本係一個測驗!之後讀education講既Pre-writing,Miss根本無做過。一聲令下,全班就乖乖寫文,佢就坐低發呆至打鐘!

分數至上既年代,每個mistake都扣1分!50分總分,grammar 部分既分數響初頭幾次作文都好低分,攪到「肥佬」,完全令我失去信心。

那日眼見呢度老師教writing,老師先讓大家看一張相片,再問小朋友相中既事物,之後佢會供詞和句子開頭。之後,同學仔就要在簿畫圖,再用文字形容所畫。

呢個方法完全俾學生自主寫什麼,我見個個都寫得好開心!不過,由於佢地握筆未成熟(雖已經5歲!),圖畫都不太清晰。而要他們寫句子,大多數都係一句起,兩句止。字體不正已是預期,但老師態度係鼓勵,唔係批評。老師準備了常用字咭,唔識串既字都可以問我地大人!結果每個小朋友都交倒貨,完成課堂目標。

其中有個小朋友,就請我教佢串字,而他的句子就係 – I can see a pumpkin eating a lizard. 陪住佢一齊做一齊想,他想到時仲笑埋出來!

不需理會句子是否合邏輯,字體端不端正,咁樣開始寫作課一定不會嚇走學生吧!

香港既小學生,係咪都係咁樣教英文作文呢?

想起你就見到你

搬了屋轉了校,適應新既生活和節奏已經有一排了。以前認識既家長朋友,已經不常見,各有各的生活,起碼放假先會再見。而呢度既通信方式,也不流行messaging和whatsapp, 係比較傳統,就係有乜說話,三口六面講清楚,呢度講,呢度散。

還好的,走入whatsapp 群組往往係煩惱既開始。依家真係無group一身輕。

今早突然好想念一個家長朋友。佢既年紀接近自己既媽媽,也可能係呢個原因,以前每個早上都特別喜歡搵她chit chat兩句。而佢又不介意和我分享生活點滴,以及我不太local 既英文。而重要的,係我地都好關心孩子返學既情況,佢不會似其他家長not bother既態度。而之前,她也似我地一樣,每日跨區湊返學,當中既艱辛就係我地既shared context。

雖然佢係住在我地呢區,但要無約之下見到一個人,其實真係好難的。就響我地正想離開商場之際,見到她了。這些不是緣份,又是什麼?

 

每天一學

傾開計,家長朋友話好佩服我地從咁遠既地方搬來,要所有東西都要重新學習過,佢不太理解。

其實,我不怕學習新事物。我當自己係初生嬰兒,心態亦一樣調整。畢竟,新事物總會刺激思維,令我地產生新既體驗。來到新地方,更加係每日一個learning curve。固有既common sense當然有用,但每一樣新體驗,就可認識多一點。

今日響好多Asians會蒲既town centre,我地撞到一個奇怪既人。初時我地都不為意,但當另一半在嘗試泊車,將架車泊在劃定既範圍時,呢個怪人開始狂笑。佢戴住太陽眼鏡,一直望住我地笑,感覺恐佈。之後,落埋車,用部電話影我地和架車相。當時,我地架車都未泊好架,如果另一半不夠calm, 無集中精神,踩一腳,意外就隨時會發生。影完相後,佢上番車繼續那個表情。我好嬲,真係想落車問佢乜事,仲乜影我地。見佢呢個本地中佬,究竟做呢些事想做乜?我大大既搖頭,再狠狠地stare住佢。無發狂罵,無舉中指,我地忍住氣,快手落車去鋪頭,再番來就離開。

返到屋企,先開始識感覺驚,但也為我地全部人安全回家鬆了一氣。另一半想泊好車不阻其他人,竟會成為呢個痴線佬既取笑對象,我話,根本唔係我地既問題。留響車係最正確的,無做任何激烈既動作也是正常的。泊得不好,對方感覺有趣去笑下,我地不會小氣,但如此亂來影我地相,可能放上網再盡情恥笑,實在好恐佈!

Email左town centre, 好快有了回覆。例牌提我地可以報警,搵商店幫手⋯⋯有CCTV但應該無乜結果,又發現了原來「實Q」既工作時間,係店鋪關門既時間。而今朝,係未到當席時間⋯⋯

其實今日係公眾假期,我都好appreciate呢位manager咁快既回覆,也欣賞他既坦白,話我知無錢請「實Q」!

唔夠錢,真係呢度社會既問題。多美麗既國家,都會有本身既問題。

有生之年,係首次感覺呢種欺淩。不早不遲,係活生生教孩子既材料,提醒佢多考慮別人感受和保護自己既意識。

呢些,都係本地文化。又學倒新野喇!