想起你就見到你

搬了屋轉了校,適應新既生活和節奏已經有一排了。以前認識既家長朋友,已經不常見,各有各的生活,起碼放假先會再見。而呢度既通信方式,也不流行messaging和whatsapp, 係比較傳統,就係有乜說話,三口六面講清楚,呢度講,呢度散。

還好的,走入whatsapp 群組往往係煩惱既開始。依家真係無group一身輕。

今早突然好想念一個家長朋友。佢既年紀接近自己既媽媽,也可能係呢個原因,以前每個早上都特別喜歡搵她chit chat兩句。而佢又不介意和我分享生活點滴,以及我不太local 既英文。而重要的,係我地都好關心孩子返學既情況,佢不會似其他家長not bother既態度。而之前,她也似我地一樣,每日跨區湊返學,當中既艱辛就係我地既shared context。

雖然佢係住在我地呢區,但要無約之下見到一個人,其實真係好難的。就響我地正想離開商場之際,見到她了。這些不是緣份,又是什麼?

 

Advertisements

每天一學

傾開計,家長朋友話好佩服我地從咁遠既地方搬來,要所有東西都要重新學習過,佢不太理解。

其實,我不怕學習新事物。我當自己係初生嬰兒,心態亦一樣調整。畢竟,新事物總會刺激思維,令我地產生新既體驗。來到新地方,更加係每日一個learning curve。固有既common sense當然有用,但每一樣新體驗,就可認識多一點。

今日響好多Asians會蒲既town centre,我地撞到一個奇怪既人。初時我地都不為意,但當另一半在嘗試泊車,將架車泊在劃定既範圍時,呢個怪人開始狂笑。佢戴住太陽眼鏡,一直望住我地笑,感覺恐佈。之後,落埋車,用部電話影我地和架車相。當時,我地架車都未泊好架,如果另一半不夠calm, 無集中精神,踩一腳,意外就隨時會發生。影完相後,佢上番車繼續那個表情。我好嬲,真係想落車問佢乜事,仲乜影我地。見佢呢個本地中佬,究竟做呢些事想做乜?我大大既搖頭,再狠狠地stare住佢。無發狂罵,無舉中指,我地忍住氣,快手落車去鋪頭,再番來就離開。

返到屋企,先開始識感覺驚,但也為我地全部人安全回家鬆了一氣。另一半想泊好車不阻其他人,竟會成為呢個痴線佬既取笑對象,我話,根本唔係我地既問題。留響車係最正確的,無做任何激烈既動作也是正常的。泊得不好,對方感覺有趣去笑下,我地不會小氣,但如此亂來影我地相,可能放上網再盡情恥笑,實在好恐佈!

Email左town centre, 好快有了回覆。例牌提我地可以報警,搵商店幫手⋯⋯有CCTV但應該無乜結果,又發現了原來「實Q」既工作時間,係店鋪關門既時間。而今朝,係未到當席時間⋯⋯

其實今日係公眾假期,我都好appreciate呢位manager咁快既回覆,也欣賞他既坦白,話我知無錢請「實Q」!

唔夠錢,真係呢度社會既問題。多美麗既國家,都會有本身既問題。

有生之年,係首次感覺呢種欺淩。不早不遲,係活生生教孩子既材料,提醒佢多考慮別人感受和保護自己既意識。

呢些,都係本地文化。又學倒新野喇!

湊仔和生仔

有個剛生完孩子既朋友同我講,自己一個湊唔掂個囡。父母才剛剛陪完坐月返左去,佢又想由呢度搬返去,將BB交俾佢地湊!

佢背後一定有其他我不知道既故事。但每當聽到呢些大人,將自己應負既責任留俾年老既父母,心情總係好憤怒。

夠大聲講,因為本人就係和孩子爸爸一手一腳湊大個細路。由教人地孩子,到全職教自己既孩子。

一湊就過左幾年。中間孩子有好多關鍵時刻,幸好我地都在場,保護也好,俾意見也好。我想,守護自己既孩子係父母既責任,點難都可以解決,而不是推卸責任。

呢度係點湊仔?雙職父母就會請nanny, 幸運既就由老人家照顧,都幾似鄉下既。 又或者,最常見既係媽媽全職stay home mum,而好多時,佢地係一個湊三個。孩子大個些少,就會搵part time做,畢竟生活指數都好高,養兒不易。

一直既原則,都係想老人家玩孫,而唔係幫我湊!父母年老應該讓他們過喜歡既生活,而唔係再為我地煩心和計劃。湊細路不是俾野食咁簡單,係要付出精神和時間帶佢打針見人搵學校上興趣班周圍行去公園玩睇醫生睇書認識自己學discipline返學做功課⋯⋯

以上和孩子既一切數不清。有信得過既人,可以全日on call幫手睇住俾你去搵錢一定好爽,但係有了錢以外,和孩子既感情又可以彌補嗎?我不敢幫人地講,但孩子係看在眼裡,邊個陪自己最多時間既,就和那個人最親,就係咁簡單。當佢愈大,佢會更願意和我地溝通,呢樣都係好寶貴的。

人總係貪心,總想一切不變又想擁有更多。

好老師

孩子出現了因轉校而有既anxiety. 今天去了參觀新學校後,卻因為一件小事意外地轉換了佢既心情。

原來新校既副校,係曾經響依家讀既小學任教。我想當初一定係緣慳一面。而更重要既係,我地一邊行見到其他老師,她們一聽到現任班主任個名,眼神即刻閃亮,係那種欣賞既眼神。副校更請我地幫佢「送書」俾班主任,相信她們既交情一定不淺。

The world is so small! 於是因為呢個「意外」,好似俾孩子感覺到舊班主任仍關心她,亦容易聯想到呢年開心既回憶!我地大人知道班主任不會這樣做吧,但小孩子既心理就係這樣奇怪。於是一間佢原本無人識既學校,一下間因現任班主任而加重了安全感。回家後心情比昨天好得多。

我地大人也放心得多。正面地看,希望新老師們可以繼續幫助孩子,讓她發光發熱啊!

做個好人Be a good guy

睇鄉下既新聞,一班關心社會年輕人被重判入獄,心寒,心痛。好多人都為他們而哭了。

年輕既從政者,表達了被判的一班人都係好人。同意,但又如何?

身邊見過好多好人,光明正大做事,努力工作完成dream, 但往往不幸既事都會發生在他們身上。例子不算多,但總會問,do they deserve this?

好人難做。極度乞人憎,不會受觀迎,甚至受孤立,但至少呢些少數人係有公義之心既人,而唔係那些失去道德既大多數吧!

未做媽媽之前,有個學生曾經問我幾時會生仔。好記得當時回答了,如果我要生,佢一定要係一個好人。而老練既學生就話,好難啊⋯⋯

多年過去,做個好人一直係教孩子既原則。有時聽到佢被人「蝦」,我都不會教佢報復,以暴易暴。一來這不是呢度既文化,二來,點解要灌輸壞人既做法?

孩子一直都收到,學著做個好人。困難重重,但一定要堅持下去。

*****
Is it so hard to be a good guy nowadays? When a group of sincere young people arrested for protesting against unlawful things, as a parent, what else can I tell and teach my own kid?

It’s always lonely to be a good guy. You may feel isolated, being attacked by those who disobey the rules, but one can feel freer and happier to live.

As parents, what can we teach our kids? Is it too dated to teach such core values in the 21st century? Other than spending huge sum of money to make them learn different academic skills, how many of us would teach them the right values and stand up for their own rights and opinion?

Most of them just hope they will be blind to the dark sides and ignore everything. Just focus on studies, eating good food and enjoying life is enough.

Then, the society will have no future.

圍城Walled City

無正式讀過圍城。第一次聽,係做緊第一份工同事講既。最出名既兩句,係外面既人想入去,裡面既人想出去。

每次聽到個書名,就想起呢個quote。

和孩子既好友一家去飲茶。期間,他們問起家鄉既情況。原來同學仔既爸爸可能有轉工既機會,不過可能要成家搬去。

一時間,真係有點講不出口。腦海就出現了書既呢句話,不過好快地,就知擔心係多餘。

佢地只係去掘金,甚至可以肯定,他們對那裡既語言和文化全無興趣!像他們呢種外國高層人士,去到根本係脫離社會的,孩子也被安排入int’l school, 接受西式既教育。就算去幾多年,他們都不會理會任何事。

從前見過既外國人,就係呢種。

而他們就一直享受著來到鄉下既禮待,但掉番轉,外來既人就不會有相同既遭遇了。不公平。

****
Expats love coming to work in Hong Kong due to the extraordinary attractive salary package. A lot of them can never earn that much in their home country. I understand that when the parent of my kid’s best friend inquired me about it.

But for us who have moved away the city, it’s a bit awkward to describe the good sides of our home unfortunately.

Not because I don’t love my home, just that, as parents, it’s not a place for kids anymore.

A moment later, I realized it’s not necessary to inform them because expats never care how your city develops coz’ they are just coming for money, not future.

Okay, got it.

大膽老人

呢度普話話就等如中文,外國人不會知道乜嘢係廣東話,但呢方面真係要準備定答案,隨時隨地去話人知。

去飲茶聽到廣東話和普通話就好常見。尋日響茶樓,隔離婆婆用普通話問我有乜好食。用番大學時期所學既基本解答左佢,但都話佢知我本身係唔識講架,但佢個樣又有點不相信。

梗係啦,我講那些咁日常,深層次一點既我真係唔會知你講乜。

最後,佢「提」我要學好普通話呀,因為全球有5份1人係講架。我就發音不正既回答,廣東話都要識,都有好多人講架。

又係時候準備定點樣回呢些語言問題,不論係對普通話人定係外國人。

原來婆婆個仔叫佢一個人來飲茶,又乜都唔教唔講。成日見倒呢些飄來飄去既老人家,例如,坐車唔知去邊,掉左張卡又唔識問,英文又一粒都唔識,表現無助,又好期望你會幫佢。除了借錢,基本上我都會幫忙的。

不過,覺得佢地既仔女好有問題,完全係另一種虐待。

友誼永固

晨早返學,日本同學仔送左幅畫俾孩子。今日係佢既last school day。
短短三星期,她們開始熟絡,會一起食飯和一起玩,但呢個時候,卻要講再見,好可惜。
建立友誼需要時間,但人生卻往往不會如此。
就算我地可以飛去日本,都未必容易再見;而就算下次她們再返來,我地又未必再響度,讀書既地方也會不一樣。
太多不確定,留下了一個life lesson俾孩子。
講再見真係好難,但這就是人生了。
難得認識到友善的人,要愛護,要珍惜。

時間表

和日本媽媽farewell, 傾了好多讀書和生活既問題。
原來,他們早年已經落左腳,不過,日本仍會係他們既base, 不會搬過來。NZ只會係孩子既讀書和放假地方吧!
早年⋯⋯人生真係無如果,那些年我地仍在工作上搏殺,連生仔都無想過。而且,what if 老家不是變成這樣子,孩子既人生又會不一樣。
日本媽媽既表情,就係愛家既最後證明。
當我以為日本同學仔返去後可以抖抖,媽媽就話呢幾個星期已經算是放假了。What?
不要去羨慕,好像沒有那種福氣,但人生既時間表,真係人人都不同。

雖然不知道何時再會,但好開心自己和孩子都多了一個朋友,都算係緣份吧!

反歧視

朋友既媽媽在首都被陌生人推撞,兼被問回家。

呢種貼身既經驗我最近試過一次,但只係被輕推。呢種叫回家既,未聽過,但係話無歧視當然係假的。

從最初既不解,憤怒,對了解一下呢度文化和背景,最後結論係得啖笑。

無視都係一種。唔係覺得別人要待己如友,只係好不明白點解呢些父母可以如此無禮貌。當然,他們既仔女都係一樣,所以小朋友返學都有過不好既經驗。

笑容係免費,而且能令人快樂。每天我都會堅持面掛笑容,但知道邊個係無禮貌既,那我都會回敬佢。

小朋友返學如何自保呢?除了有強大既意志外,更重要既係一定要比他們做得出色。邊一樣都好,慢慢地我地見到有改變,有些寬容既面孔,甚至放假都想約你去玩。

唔知小朋友邊方面得到他們認同,但至少都開始明白個遊戲點玩了。

人離真係鄉賤。好快呢個話題都要和小朋友解釋由來。但我們最想既,係小朋友做好自己,分清對錯,適當時候反擊。

香港人對外國人實在太好。呢度絕對完全改變了對外國人既看法,徹底改變!