湊仔和生仔

有個剛生完孩子既朋友同我講,自己一個湊唔掂個囡。父母才剛剛陪完坐月返左去,佢又想由呢度搬返去,將BB交俾佢地湊!

佢背後一定有其他我不知道既故事。但每當聽到呢些大人,將自己應負既責任留俾年老既父母,心情總係好憤怒。

夠大聲講,因為本人就係和孩子爸爸一手一腳湊大個細路。由教人地孩子,到全職教自己既孩子。

一湊就過左幾年。中間孩子有好多關鍵時刻,幸好我地都在場,保護也好,俾意見也好。我想,守護自己既孩子係父母既責任,點難都可以解決,而不是推卸責任。

呢度係點湊仔?雙職父母就會請nanny, 幸運既就由老人家照顧,都幾似鄉下既。 又或者,最常見既係媽媽全職stay home mum,而好多時,佢地係一個湊三個。孩子大個些少,就會搵part time做,畢竟生活指數都好高,養兒不易。

一直既原則,都係想老人家玩孫,而唔係幫我湊!父母年老應該讓他們過喜歡既生活,而唔係再為我地煩心和計劃。湊細路不是俾野食咁簡單,係要付出精神和時間帶佢打針見人搵學校上興趣班周圍行去公園玩睇醫生睇書認識自己學discipline返學做功課⋯⋯

以上和孩子既一切數不清。有信得過既人,可以全日on call幫手睇住俾你去搵錢一定好爽,但係有了錢以外,和孩子既感情又可以彌補嗎?我不敢幫人地講,但孩子係看在眼裡,邊個陪自己最多時間既,就和那個人最親,就係咁簡單。當佢愈大,佢會更願意和我地溝通,呢樣都係好寶貴的。

人總係貪心,總想一切不變又想擁有更多。

Advertisements

那些年的李克勤

唔係唔鐘意聽歌,但早已不再認識最流行既廣東歌。70後既我,聽既係80年代Alan、Leslie和四大天王等既歌長大。講到近年最欣賞既歌手,男的,係Eason, 而女的,就係衛蘭,兩位出道都超過10年吧!

今日Facebook洗版既就係李克勤響商台音樂頒獎禮攞倒至尊金曲。可惜既係,網上大片負評,講他得到既係關愛座,又話他和後生仔爭食等等,真係好難聽。

太耐無留意樂壇既關係,佢首失魂記真係想不起點樣。上Youtube搵,原來首歌係聽過既,但和佢好多以前既作品一樣,不入我心。如果無mtv既輔助,歌詞背後既故事根本感動不到我。

我不識評音樂,只係從一個普通聽歌既人去講。李克勤聲底好,字正腔圓,唔係那種令你聽完幾分鐘既歌,只係會覺得唱既人係將一堆中文字擺落音樂既歌手。但處理首歌既感情,佢離開左第一間唱片公司後,俾我既感覺就係曬唱功,一成不變。

克勤曾經紅過,甚至早過四大天王。猶記得仍是Alan 和Leslie激戰既年代,某日放學經過商場唱片店,就見到佢既新唱片封套掛在櫥窗。那時候,一隻唱片售價$50以上,仲要有部唱機。一個小學生又點會有咁多錢買足裝備。聽著電台和電視,加上同學間既互傳,最紅那幾首夏日之神話仍是老地方大會堂演奏廳一生不變都朗朗上口。

克勤響我地班高小學生真係好受歡迎。我估大家除了鐘意佢既歌外,更緊要既係佢出來既形象。依稀記得,佢名校出身,本身想讀設計,但就放棄了讀大學去做歌手。中產味道好濃厚,加上當年20出頭,青春無包袱既小伙子,或者吸引了我呢種草根出身既小朋友支持他吧!

但係,人真係擅變既動物。上到中一,同學間既就係討論四大天王了!克勤早已成了實力派,即唔靚仔。佢仍有新歌派台,唱功仍完美,但比起那四個天王,話題實在少得多。佢專心做歌手,嘗試過拍戲,後來大家都知,佢離開了舊唱片公司,又做埋電視台足球比賽既主持,嘗試多棲,還有那多年和Alan既演唱會系列。

香港人會認同張學友和Eason係歌神。 點解Hacken上不到那個位?我覺得,係佢有多類型既歌,但佢既人無變。以前為他度身訂造既歌,如命運符號,係講佢初出茅蘆; 一生不變破曉時分,都講緊一個後生仔對愛人既心情;紅日也令人感到後生仔那份朝氣。或者,聽眾一邊聽音樂,真係會對歌手有聯想,覺得首歌係講緊自己。

但從某一天起,我長大了,但Hacken既歌聲好似仍停留響我初認識他既時候。他沒有錯,只係我不夠忠心,結果離棄了他。今日再留意Hacken, 真心想他繼續唱好歌,再嘗試去改變。不要理會那些無聊既批評,佢地只係後生,只係流星,卻不會永恆。

*****

文章另載於Medium, 請多多支持!
This article is originally published at Medium. Please read and support my articles.

去外國學唔倒英文

認識一個來左呢度超過20年既香港人,響度讀書,但係英文卻係講唔掂。

初聽覺得好不可思議。以我呢個本地薑,英文不算好native, 但考過ielts成績都有8分,一直都係跟本地老師學英文打基礎。去外國進修,以前實在太負擔不起。工作一排後再進修,先有一次到英國短期學習既機會練習真正既英文。

學習一個語言,最理想既方法就係親身到以那種語言為官方語言既國家,無論以讀書,或者係留低生活一排既方式去學習。一直覺得,夠膽去講,就會學到。之前在英國時,接待既家庭就曾經對我講,如果能夠留英一年,我的英文一定會大有進步。依然記得,那約10星期既相處,都學習到一點英式口音,對話也真的改善不少。呢些課室老師係學習不到的。

直至搬到呢度,生活了超過一年後,對朋友既情況反而完全理解。或者從香港人對待外國人,或者係外來文化既態度,多少令我產生了一種錯覺 – 以為外國人也是一樣接受我地,會好正面欣賞別人講英文既行為。

別的國家我不太清楚,但響紐西蘭,真係有可能永遠學不好英文。大件事!

見到尋日報紙就出了一個講從日本來打工假期既故事。兩個受訪既日本女子,原本想認識本地朋友和學好英文既目標,結果全部都做不到。佢地覺得攞住working visa來學習,搵不到人練好真實生活既英大,反而最後走番去自己既日本人堆。英文又點會講得好?

住落一段時間,好理解她們既無奈。我估計,係佢地接觸唔倒想和他們交朋友既本地人!本地人比較laid back, 慢熱,又極度喜歡小圈子式既生活。當初我地選擇了一個幾乎無華人既社區落腳,就係想在呢種環境融入外地既生活。小孩學習無大問題,而大人每天湊孩子返學就係練英文既最好機會吧!但係,意想不到既係,大部分家長既態度和無禮,就似一盤冷水日日倒在我既身上。曾經有段日子,每日除了’morning!’,’how are you?’ 和 ‘have a nice day’ 以外,真係可以無乜交流。

響一個自身存在感好低既地方,試問又點會有心機學英文?有兩個亞洲家長朋友,都係因呢種冷漠而轉校, 改去有較多自己種族既學校或地區生活,一去不回!其中一個媽媽對我講,新學校會較multi-cultural, 即多文化一點!佢既意思,應該係學校裡面多一點亞洲人,而不是小貓幾隻。

人夾人緣,唔可以怪責別人一定要待自己好。有時,就算已經釋出善意,得來既反應都會係失望的。文化衝突,大概就係呢個意思!

但講到尾,都唔係無辦法破冰。一年以來,學到了見人要超級厚面,和肯去吹水! 最緊要係,俾多點時間和耐性去認識朋友和關心對方。拿著Working visa既人,無既真係時間。而最重要維持友誼既東西,都係時間。看清一段關係既,都係時間。

 

*****

文章另載於Medium, 請多多支持!
This article is originally published at Medium. Please read and support my articles.

聖誕老人

今年我地成功做了「聖誕老人」。孩子好乖,從來無提出收聖誕禮物,可能受氣氛所致,我地就預告了佢會來!而孩子真的相信他的存在,仲緊張到午夜醒來!我地就話,只有乖孩子,仲要訓著左,先會收到禮物。聽到佢見到禮物時既喜悅和滿足, 我地絕對樂意年年延續呢個傳統啊!

轉了地方住,卻感覺聖誕氣氛不比鄉下或日本!居住既地區,燈飾欠奉,town centre既商場有禮物展銷,但和平日一樣,望落去一點都不吸引。反而去到遠一點既大商場,終於見到多一些人潮,能感覺到濃一點既過節氣氛。只係隱隱地望到逛街既人無乜笑容,或者,過節要消費實在係件頭痛既事。而望落去,每樣貨品也實在不便宜,online買野還好了!

西人過聖誕,就似我地過年,係一家團聚既日子。家長朋友既孩子外遊,聽出他們不能一起過節既失落。今年聖誕無收到要搬屋既消息,才有心情去想點過節。公眾假期呢度乜都關門,只有大自然係開放,應該會去多一點。

平安是福,但願所有人都度過一個愉快既聖誕節,迎接新一年。

教仔要等

為了食牛奶,breakfast時間訓話了孩子一番。

佢有她的口味,我地有本身既堅持。都好耐無飲過牛奶了,點解可以咁抗拒?
嘈完一輪之後,孩子投降,算做食多幾口。

大人們都好勞氣。教仔就係如此,想無吵罵聲,可以好易。細路要乜,就俾乜,一定唔會嘈,短期可以的。

爸爸話就不到咁多,都唔係既,有些父母不想孩子不高興,拼了老命都會滿足孩子。邊有得嘈!

我唔係虐待孩子。只係,今日spoil你,只係俾了佢食慢性毒藥。長大後,佢對於生活上既不如意,就會完全想不到方法解決。衰一點講,只會想到「一走了之」,也一定會成為家庭裡面既炸彈!

好多時候,佢想得到既東西,我地都採取delayed gratification, 要佢等,要佢在生活上合作,負好自己應盡既責任,才可以有reward。小學生了,都應該明白銀紙唔係嘟一嘟就有,無限增值的!而身為家庭一分子,也有自己的角色。

見得太多,父母真係不想害死佢。

再見

終於到了講分別既時候。原本這一天比我預計既提早左。

呢一年來孩子在學校好開心。有愛心和欣賞佢既班主任,學習方面又適應無問題,最重要既係有一個BFF。佢地那種友情,一直讓我放不低。畢竟,佢係孩子響呢度既第一個好朋友。無人能保證,將來還有類似既朋友支持她吧!

班主任在放學時拉埋我一邊,話佢地兩個出年不能同一班,希望我明白⋯⋯這個安排,和我原本提出既完全不同,但我無不滿,反而放下心頭大石!而為免令班主任煩惱,順理成章講埋轉校。BFF既家長好shocked!係呀,要我講分離真係比道歉更難,但大家都明白點解我地會咁。我地既決定,真係make sense既!

每次選校都似賭博。初來報到,就係因為學校原因留在呢個showroom地區搵地方住。奈何現實和理想不符,現在感覺就似所有effort in vain 一樣吧?

孩子無完全同意轉到屋企附近讀書,但大人既辛勞她也看在眼裡。只能期望孩子能幸運有個好既班主任,助她成長和學習,而不是忽略她的需要。

也許有一天,我地會返到showroom附近住呢?Who knows?

與細路討論

今日響學校既義務閱讀堂,和參加既小朋友有一段有趣既討論。

我地一齊睇完本書,之後我問佢鍾不鍾意本書。可選既reader, 純粹以訓練閱讀為主,趣味只一般。那只係個關於一隻狗在dog show贏了獎既故事。佢不喜歡係好正常!再問點樣可以令到個故事有趣一點。佢就話要有死亡既原素。

大人角度梗係不同意啦,但之後佢就話,反正都要經過呢個階段,依家只係提早左,生命短暫左一點呢!

呢個答案又幾有哲理和幾有point啊!我地雖各持己見,但都忍不住稱讚了他。不同文化真的會孕育不同既人,無人發脾氣,也無人發嬲,真心欣賞呢類書本既理性討論。

 

*****

文章另載於Medium, 請多多支持!
This article is orginially published at Medium. Please read and support my articles.

 

 

小心太太

呢套日劇既幾位主角,都係全職主婦,而第三集既主題,正中近日生活既事。
呢次講主婦被主婦欺凌。金句好多,有興趣知既不妨慢慢欣賞細味。
其中我最喜歡既,有「被欺凌的痛苦,只有當事人才明白。」
早前家長朋友曾對我講過被家長無視一事,我也受著呢些無聊既對待,但上心程度較低,安慰朋友時也用了一種較正面既態度,希望佢可以儘快忘記。
現在看,我既方法一定無用吧!
一直以來都覺得朋友係強者,其實呢次佢選擇離開,像表現軟弱,但我知呢種情況真係好難撐下去。同意主角話,不知道自身弱既人,才是最弱既人。

日本既情況和外國相似,社區小,而母親多數係全職留家主婦,狹小既空間中,再有不愉快既事,會無限放大,看不開,但係又難以逃避。唔係個個可以搬屋一走了之。如香港有工人去湊仔,應該可以免除呢些問題吧!只要無參加任何whatsapp group, 是非會少好多吧!

真的,知己再學習變強才是出路。

解憂人走了

解憂朋友離開了。未知原因,但心裡好失落。
數星期前才對我說學校有多好,社區有幾方便,還有仁慈既業主。呢些都係一個完美得令人羨慕既條件,他們都擁有了。
想起當年為孩子轉校,不會因家長原因,而係發現孩子不開心,人仔細細,一邊食飯一邊喊。
讀PN如此,又何必繼續?離開既決定也證明係正確的。
如果因為班上既家長做了些什麼,就決定轉校,感覺有點極端。佢既一班,家長更hostile, 我的一班,至少懂假假地走過來多謝我地送既小禮物,返了成年總算傾左第一次計。
我都知一直無人理佢,日子的確難捱既。呢些都係我地「外人」要面對既苦況。
不過,家長之間其實又不必成為朋友的。有緣份的就傾,無緣份既也算吧,上心就會好辛苦。
另一方面,佢總算仍有機會選擇。我也為佢感到安心。
至於真正要「走」,怕得要搬家既原因,我都開始不太想知。真相往往好可怕,不想我知也算吧。
又到學期末,原來下學年既老師都是好hea既一群。朋友既行動,也激發了我想和孩子轉校既意欲。須知道,A good teacher can make a difference. 孩子來到新地方既進步和成長,都靠好老師既一直幫忙。

也許,呢個學期可以去參觀一下地方,有需要時就可以隨時行動了。

有聚有散

響第二個家認識既第一個「真正」朋友,今天對我講孩子要轉校搬家了。
事出突然,一時間不懂反應。
她係我每天湊孩子返學最想見的人。縱使每天一會兒,但係彼此都能藉那時刻為對方解憂說笑。
也許是文化不同既關係,與其他人係難以建立呢種關係。
好想知道原因。畢竟,放假前佢仲對我講好喜歡學校一切,和所住既社區。佢比我地幸運,能有一個好業主,既不迫遷,更為他們打理花園種花。
我不理解發生了何事,但相信原因一定係重要得令他們想改變生活方式。

想起了朋友對我講既一番話 — 別人永遠不能代入你既處境。當我在擔心孩子既健康時,人地係不會關心的。
也許吧?!

又會回歸寂寞既日子。幸好大家都習慣了,也沒有什麼話喜歡不喜歡的。
緣來緣去,有空的就聚在一起,但願朋友一家快樂開心。