Commitment

我怕commitment, 縱使在多方面都能守好我的commitment.

唯獨是工作!呢方面,猶如一個花花公子,永遠不想停下來。

人生卻有好多事情是無奈的,呢次,絕對係。

只有向好一點方面去想。

女仔點會唔怕肥。如果你想知點解我唔飲汽水、唔狂食薯片零食和麥記,那只有一個原因,就是怕肥。

其實每個細路都有一段好愛吃呢些垃圾食物的階段,我也當然有。只係去到中學階段,就是一個原因,怕肥!結果,從此可以保持到一年都不飲一啖可樂,縱使,我仍然會飲甜美非常的咖啡。

吃甜吃可口的食物,絕對是一個令自己開懷的方法之一。試過在疲倦不堪時,飲下甜極的Ribanna, 的確具醒神作用。

再大個一點,我明白太肥會帶來身體很多的毛病,所以,更加避之則吉。

呢一排,卻不能再有呢個想法。少食多餐,仍選有營養的進食,結果真的重了數鎊,算是成功吧!

但我呢個增肥過程,將會好漫長。開始要想如何減肥做回別人眼中的竹簽人,哈。

慷他人之概

當別人有求於我,做得到的我多數會應承;但有情況係,原來有人想趁機令自己做事更加方便而加重了你負擔,我可以幫,又會唔會幫?

一定不會。

好似好無情!但係,佢都對我無情!在一些完全可避免的情況下,想別人成全。如果你無心的,或者是個大意的人,都還可原諒。可是,一些聰明心水清的人,不難想象佢絕對係想慷他人之概了。

太多這樣的人吧!今天我沒有好決絕說不,但意思也很明確。除非是上司叫我,否則我不會應承。

有時候,真的要保護自己!

直覺

直覺估中了新屋主是誰!那刻當然錯愕,因為佢正是照我肺的那位高層。

有咁既直覺係因為佢的語氣和以前很不同!不是說去到權力頂層就會變得不一樣,至少現任屋主都不是這樣!

突然想起套戲Lord of the Rings! 呢套戲最成功的地方,係將人類對權力的desire寫得很仔細而真實。人真的可以為了獲得權力而不惜一切,變臉……什麼都可以做!

朋友話,身份變了,自然就會變。同意,不過,我喜歡平易近人的多。

來自別人對自己的尊重和賞識,而不是以權力去壓制別人。

說得太理想吧,又有幾多人能夠做到?

照肺

呢排常常反問自己一些事情。呢個exercise, 常做的其實更可公平的去看一件事。好多時候,我係好怕自己會subjective.

今天照肺後,其實好不爽。我覺得和佢完全溝通唔倒!佢句句追過來,就算我將事實坦承的講出來,似乎也不能改變佢的subjectivity.

有一刻,我真的懷疑自己是否適合做呢份工。

讀書的時候,老師係教你一套,但到不同的地方工作,對住不同的細路,如果永遠假設用一套而可行走江湖,那真的太天真了!那也實在不會work!

今日,你以為仲可以好serious好strict 咁話細路,都未必人人會聽,而且仲會記愁!我唔係假設佢地一定唔聽,只係你會留意到,知你心意的細路永遠不會好多。而你想細路收到你的advice, 所要用的方法卻不可以千篇一律。

對得最多的一班細路,我最清楚他們的強弱點,用的方法只要見到成效,那管是否你心中那種?

算了,照肺過程中,不斷的提醒自己不要和佢argue, 此時此刻,我勝利了又如何?

最失望的,莫過於這種的溝通方式!

很多事情,對住不關心的人,不想再說。

專業大話精

講個「信」字,唔係人人做到。

唔係唔想相信人,但發現依家的人,原來簡單的事都可以講假話!

我當然唔明白……

又發現多一個專業大話精!

懷疑

坐小巴,同校的細路女落車後,乘客發現她跌了銀包。二話不說,我立刻問前座的乘客取回它,打算明天還給她。

我致電了回校,叫同事立即通知佢,費事佢驚和擔心。

很傻的,事後我真的想,這樣做是否自找麻煩!原來,我真的不太相信細路啊!

這些都是以往的經驗得來的。不過,每次在我接近絕望的時候,往往都是細路再給我全新的希望!令我不易放棄這份工作。

人要保護自己,不過,我是做著對的事,究竟我在怕什麼?

過關

做人,每天都在過關。呢一次,其實覺得幾無助。

心情係好矛盾的。一來,我不願意想太多或期望太多。

我能夠主動做的已經做了,而結果,則要好被動地去接受別人告訴我。無奈……

但是,這條路已經不可退下去了,只有一直向前走。

當我知結果時,心情平復不少。只係,我知道一切只是開始,未來的路還漫長。

支撐下去的,是信心和決心吧!

母親節

又是一年一度的母親節。和老媽的慶祝不鋪張呢!她也從來不會俾意見,總之我們想點,佢總會話得。

呢種相處方式,好舒服。

老媽原來一直都覺得我不懂她的心事!慘!對住一個咁樣樣都得的阿媽,我呢個傻女兒,真係到今時今日都係估佢唔倒。

以為佢會嬲,點知佢無;以為佢無事,點知又會爆料話你知佢的心事。

我們之間,最珍貴的係坦承的溝通。儘管我承認,一直以來,都會吵架收場。但係,講完就算,唔放在心上。大家知道大家想點,唔好放在心!以後大家更懂相處的方式。

從來都不懂逗阿媽歡喜,因為個人比較口密!但呢排發生的一些事,當我極度需要一些精神支持時,有阿媽的積極反應,真令我很安心。

做小朋友時,最怕阿媽的長氣;但依家,我最愛聽佢講呢些長氣話。

今年的母親節,真的不一樣。

祝天下母親母親節快樂!

幸運

平平無奇的一天,可以被單一件事弄成令人失落。

原來,有好多黑仔事發生,都可以被單一件幸運事擺平。

怪了自己忘記取張八達通卡,之後全天黑仔事像無停過。呢種連續性都嚇我一驚,唔係掛,咁都得?

全天都燥底,好彩沒有在細路身上發洩出來。我好專業既!

回到樓下的便利店,是我最後的希望了。究竟有無人路不拾遺,交了張卡俾店員呢?

店員阿姐真係有保存著我張卡呀!謝天謝地。

曾經真的想過不再換新卡了,以後就用散紙吧!但原來坐車已經封殺了好多兌換硬幣的機會,單係坐地鐵,已經要每程俾多幾亳!

係既,要小心一些。雖然呢排可以持著「我係無哂記性」去安慰自己,但係一次比一次嚴重,真怕呢個臨時症狀會變成習慣,衰老下去,什麼都可以唔見!